Ego sum Alpha et Omega. Heb dalleth na diwedhva pur wir my yw, omma a-ji dhe'n kloudys, war fas an dowr yn sertan, tri ferson yn unn dywses ow kesreynya bys vykken yn meur enor ha vertu. My ha'w Mab ha'n Spyrys Sans, tri yth on yn unn substans, komprehendys yn unn Dyw. My yw henwys Dyw an Tas, ollgalloesek dres pub tra. Skon y fydh gwrys der ow ras nev, plas rial dhe'm trigva, ha'w thron-sedha ow bodh yw may fo henna. Ha'n nor ynwedh a-woeles skon orth kompas a vydh gwrys. Honna a vydh ow skavell droes rag ow plesour pup-prys, ha dhe'm enor maga ta. Nev omma yw gwrys genev, orth ow dywses yn sertan. Hag ynni y fydh gorrys neb a'm gordh gans joy ha kan. Naw ordyr eledh gloryus i a vydh, rial ha splann, kannasow dhymm dannvenys rag ow servya bys vykken. My a vynn may fons nevra. Lemmyn pub Ordyr dh'y se my a vynn may fo gorrys, ha pub onan dh'y dhegre a vydh gorrys dhe'm servis pan vynnav vy kommondya. Omma nessa dhe'm tron vy an kynsa tri a vydh gwrys. Cherubyn, an ughella ty a vydh. Deus a-rag uskis; Serafyn, ynwedh Tronys. Ow gordhya oll hwi a wra, par dell yw ow bodh nevra, omma pub prys. Ha ty, Lusifer golow, yndella yw dha hanow. 'Ugh pub el ty a ese' An kynsa Ordyr ty yw. Gwayt ow gordhya war bub tu, dhiso jy par dell goettha. Y'n sekond degre y fydh gwrys tri Ordyr moy, yn sertan. Deus a-rag dhymm, Prynsipatys. Ty a 'sedh omma poran, Potestas y'n barth arall, Domynashyon y'n tu ma, ow praysya hag ow lawdya dhe'm hanow nevra heb gil. A'n tressa degre a-woeles my a wra tri Ordyr moy. Argheledh, Ordyr pur vras, dewgh a-rag omma dhe vy, ha Vertutys kekeffrys. Ha'n eledh, y'n barth dheghow hwi a 'sedh omma heb gow. Dhymm y fydhowgh kannasow, hag a wrewgh ow arghadow gans joy bras ha kan pub prys. Lemmyn pan yw dhymmo gwrys nev ha nor orth bodh ow brys, ha'n naw ordyr kollenwys ha'n kynsa jorna spedys, my a's soen gans ow ganow, hag a vynn diyskynna dhe'n nor yn-dann an kloudys, hag ow bodh guthyl ena my a vynn, may fo gwelys ow bosa Dyw heb parow. Lemmyn y'n sekond jorna gwrav Braster a-dhesempis. Y'n ebrenn eus a-wartha my a vynn bos golow gwrys hag ynwedh bos diberthva sur ynter an jydh ha'n nos. Ny fyll dhymm konduk a dra war an bys der ow galloes. An mor bras yn kott termyn a-dro dhe'm tir a vydh dres, rag y witha pur ylyn orth harlotri prest pub prys. An tressa dydh my a wra dhe'n gwydh sevel yn-ban, ha doen delyow teg ha da ha flourys hweg, yn sertan. Ow bolonjedh yw henna, may tokkons ynna pur splann frutys dhe'm bodh, rag maga seul a dheg bywnans hogen. Y'n peswara dydh bydh gwrys an howl ha'n loer yn tevri, ha'n ster ynwedh kekeffrys, rag gul golow vynari. An re ma yw fin gonedhys. Ow bennath y rov dhedha. Y'n pympes dydh, orth ow brys, an puskes, heb falladow, hag oll an ydhyn keffrys, my a's gwra dhe'm plegadow, hag oll an bestes y'n bys, gans pryves a bub sortow. An re ma yw oll teg gwrys. My a's soen warbarth, heb gow. Peace, I say, oll eledh nev! Goslowewgh dhe vy lemmyn! Krysewgh ow bosa pryns krev, hag ynwedh dhy'hwi chyften, byghan ha bras. Lusifer yw ow hanow, pennsevik yn nev omma. Ow howetha yw tanow. hwi a woer yn ta henna, ow bosav gwell es an Tas. My yw lantern nev, ywis avel tan ow kolowi, moy splanna es an Drynses. Henna degewgh hwi dustuni, ow bosav pryns pur loryus. Oll gans owr ow terlentri yth esov, heb dout y'n kas. Splanna es an howl devri, hwi a yll warbarth gweles ow bosav, sertan pub prys. Ny vynnav orth el namoy dos dhe'm stat marnas my. Henna yw ow thowl, devri. Maga fras ov avel Dyw. My a gommond war bub tu myns eus yn nev dhe'm gordhya. Eledh oll, hwi a glywas, pandr'a gewsowgh dhymm lemmyn? Dell nag o'ma polat bras? Gorthybewgh hwi oll, pub onan. Hwi a woer pyth o'ma. An Tas gallas alemma. My a dewl ny dheu omma bys vykken mara kallav. Lusifer, ty yw henna sur a bass myns eus yn nev. Kreatys nobyl omma yth o'ta a natur krev, ha my a'n krys. Sur rakhenna dhe'th enora my a vynn, 'ugh an Drynses. Ty greatur unkinda, erbynn dha Vaker ow kows! Prederi prag na wre'ta y feusta gwrys, ty was lows, gans Dyw omma? Ganso pan wres komparya meur dhe vlamya yth osta ha paynys y'fydh ragdho. P'yw henna a vydh mar vold kows ger erbynn Lusifer? Here he has unto you told that in heaven is not his peer, ha my a'n krys. Hwi a'n gwel ow terlentri splanna es an howl devri. My a'th enor, dhymm dell res. A taw, na gows a henna my a'th pys; krys ow lavar. Neb a'n formyas ev omma a'n deform arta, preder, y vodh pan vo. Mar trIgowgh hwi y'n kryjyans na moredh hwi a's bydh ragdho, trestyewgh dhodho. Pynagoll yw a lavarro nag yw Lusifer wordhi omma dh'agan governa ha bos penn yn nev devri, a lever gow: eya, ha wordhi pub prys dhe vos yn tron esedhys avel Dyw, sur heb parow. My a'n gordh omma dell res, war ow dewlin kekeffrys, rag y vos mar garadow. Dell wrama reynya omma yn tron 'wartha gans glori, hwi a 'sedh warbarth genev, myns a goello orthiv vy, poran ryb ow thenewenn. I was mad-e of a thought. You may be glad of such wight, and in heav'n so gay y-wrought. Seemly am in every sight. Come up to me, everyone, hag y'n eur na gwrav assaya dhe vos mester war an tron. Ty, Lusifer, unkinda meur yth os orth dha Vaker. Dout yth yw dhis rakhenna kavoes meur y dhisplesour, dell os wordhi dhe henna. Prag na wre'ta prederi y feusta formys, devri, der y wrians ev omma? Der henna, preder yn ta. Ev a yll der er arta dhe'th dhistrui, 'skemunys. Ty, Mighal, re stout yth os pan wres orthiv vy settya. My a grys hag a'n soppos y fynnses jy komparya lemmyn genev. Na wres, na wres, na borth dout, ty, nag oll dha gowetha. Mara kwredh, my a'gas klout. Rakhenna gwrewgh ow gordhya ha warbarth trestyewgh ynnov. Hwi a'm gwel ow terlentri splanna es an Tas devri. Henna krysewgh ow bosav. A Lusifer. Lusifer, ty a veu oll lantern nev, ha dredhov sertan pub eur ty a veu eksaltys brav, hag a'th settyas pur ughel. Lemmyn meur os unkinda orthiv vy pan wres settya. Rag dha woeth, dhe bayn nevra ty a wra diyskynna mayth elles isel. Determys ov dhe unn dra, ha konkludys maga ta; dhe wuthyl unn den omma a dhor ha slim dhe'm servya, ha'th plas jy dhe opya, rag kollenwel an roumys a vydh voyd yn nev uskis dredhos jy ha'th kowetha. Ifarn ragos a vydh gwrys. Uskis kommondyav henna. Ena ty a vydh trigys, ha myns assentyas genes genes jy a'n naw ordyr. Yn paynys bys vynari heb ronson vydholl na fin, ena pub eur ow mornya rag galarow, bys worfenn, hwi a vydh, my a lever. Ay! A vynn'ta jy orth mab-den pan vo gwrys a slim hager okkupya rag sertan ow roum vy, na'n jeves peer omma yn nev? Henna 'via hager dra! Den a vynn'ta gul a bri dhe dhos omma dhe'n plas ma neb yw lenwys a glori? Ragdho wordhi nyns yw ev! Na, na, ny vydh yndella. My a worthyp dhis henna. An plas sur lowr dhiworto my a with hwath, re'm lowta, ha dhiworthis jy keffrys. Ty a'm gwel vy krev omma hwath pur brout ow trebuchya. Hanter an eledh genev vy assentys yth yns, syrra, dhe'm mentena yn spit dhis, dell wel'ta jy. For well nor woe I will not go. I say you so. This will not be, dhymmo vy krys. Rag my a omsyns sertan 'ugh peub myns a veu bythkweth hwath formys. Taw, Lusifer milligys, y'n golonn dell os goethus. Rag skon ty a dhe baynys heb redempshyon, dhymmo krys, sur dhymmo krys. Oll dha splannder ha'th tekter y treyl skon dhis dhe hakter, ha meur euthek bileni. MIghal, pryns ow chevalri, ha'n eledh a'n ordyr naw, an rebellyans ma devri - dhe'n dor ganso, mester ha maw, dhe ifarn, hager drigva. Ena trigens yn paynys, ha galarow meur pub prys, yn pur sertan rag nevra. Deun warbarth, an naw ordyr! Helghyn yn-mes Lusifer a-dhesempis mes a'n nev. Ty jett, gwrav dha eksamnya. Prag y fynn Dyw ow dampnya, ha my mar wolow ha krev? Rag dha vosta milligys hag y'n golonn re woethus. Der reson dhis my a brev. Ty fol, prag na bredersys a dhorn Dyw y feusta gwrys, ynwedh ganso eksaltys dres myns el yn nev 'sedhys omma yn y dron 'sedhys? Even y'n tron mynnav 'sedha, ha'n keth plas mynnav gwitha hwath, yn spita dhis. Keffrys my ha'm kowetha der gledha a vynn tria ow bosav moy wordhi ages an Tas, sur, pub prys. Warnedha, myns eus yn nev! Gwren yn kerdh y helghi eev dhe ifarn, dhe dewolgow. Ha hwi oll y gowetha, kewgh yn kerdh ynwedh gansa! Kronkyewgh i gans kledhedhyow! Out, ellas, gallas fasow! Yth esov yn tewolgow. Ny allav dos anodho. Yn pytt down yth ov tewlys, a-berth yn ifarn kelmys gans chayn, tan a-dro dhymmo. Kyn na'm boma lowena, yma lower 'skynnys genev a'n eledh sur dhe driga. Gallas Lusifer, drog pryv, mes a'n nev dhe dewolgow. Ha lemmyn yn y le ev my a vynn heb falladow unn den formya yn vali Ebron, devri rag kollenwel yredi an le may teuth anodho. Dell on ni onan ha tri Tas ha Mab yn Trinity, my a'th wra jy, den, a bri haval dh'agan fas hware, hag a hwyth yn dha vodi spyrys, may halles bywa, ha'n bywnans pan y'n kelli dhe'n dor ty a dreyl arta. Adam, sav yn-bann yn klor, ha treyl dhe gig ha dhe woes. Preder my dhe'th wul a dhor, haval dhymm dhe'n penn ha troes. Myns eus yn tir hag yn mor, warnedha kemmer galloes. Yn sertan, rag dri askorr, ty a vyw may fita loes. Rag dha gerensa lemmyn my a vynn gul paradhis, plas delysyous dres eghenn. Rag ow flesour otta gwrys! Lower flourys a bub eghenn, y'n plas ma otta tevys ha frutys war bub gwydhenn. Y tyv gwav ha hav keffrys. Ha lemmyn, war oll an plas my a wront dhis bos gwithyas, war bub frut, losow ha has dhe'th plesour, dhis my a as. Saw bydh war dhymmo pub prys. A'n keth gwydhenn ma omma gwayt na vo gensi mellys; my a'th charj a-ugh pub tra. An wydhenn ma yw henwys Gwydhenn Godhvos Drog ha Da. Mar pydh hy frut hi tastyes ty a vydh dampnyes ragdho, ha sojet ankow dredho ty a vydh; preder henna. Tra moredhek yw sertan gweles Adam y honan heb kowethas. Adam, kosk dhejy lemmyn. Ahanas tenna asenn my a vynn, a'th tenewenn, hag a honna pur sertan my a vynn gul dhis pries. Skon a onan dha asow my a wra dhiso parow pub eur dhis rag dha weres. A, A, A, ow Arloedh da! Benyn hi a vydh henwys. A'm korf vy gwrussys honna: Eva a'm asenn yw gwrys. Ragdho yth os bennigys! Adam, otta an puskes, ydhyn y'n ayr, ha bestes kekeffrys yn tir ha mor: Ro dhedha aga henwyn; i a dheu dhe'th worhemmynn, saw na vegh i war neb kor. Yth hanwav bugh ha tarow. Oll an chatel dibarow aga henwyn kemmerens, margh ha kasek hag asyn, ki ha kath ha logosenn, dyffrans ydhyn ha serpons. Y rov henwyn dhe'n puskes, siwyon, penngarnes, syllies; my a's reken oll diblans. Rag bones oll teg ha da yn hwegh dydh myns eus formys, aga soena my a wra, may fo'n seythves dydh henwys an dydh sur a bowesva a bub den a vo selwys. Yn diskwedhyans a henna my a bowes desempis. Gallas genev hager dowl dhe bytt ifarn mes a'n nev. Ena my a dhug an rewl, ha lemmyn yn payn pur grev yth esov, a dhur nevra. Nyns eus dhymmo remedi. An trespass yth o mar vras. Ny amont hwilas mersi. My a woer na vynn an Tas ow foli dhymmo gava. Rakhenna, oll an venjans a allav dhe brederi my a vynn gonis dehwans der neb for' a vras envi. Ny wrav vri erbynn p'ywa. My a woer yma formys gans an Tas unn den a bri. Haval dhodho yth yw gwrys, oll y gorf yn pur semli. Ny allav perthi henna. Envius ov er y bynn. My a vynn tewlel neb jynn dh'y doella, mara kallav. Gans Dyw yth yw apoyntys warden war oll paradhis. Der henna yth ov grevys, y weles ev eksaltys, ha my dres dhe iselder. Dhe henna yma gwre'ti, benyn yw henwys Eva. Gwrys a'y asenn y feu hi, marthys teg a-ugh pub tra, saw hy skians yw brottel. My a vynn, mara kallav, hwilas neb for' dh'y themptya, par dell oma gwas sotel. Now Adam 'ma ow lordya avel dug yn paradhis, ha my sevelyek omma yn ifarn yn tan, pup-prys yn poethvann bras ow leski. Saw an keth Adam yw gwrys my a woer heb dout y'n kas, dhe gollenwel an roumys eus yn nev der ow goeth bras yw voyd dredhov ha'w meni. Saw mar kallav, der dhevis, gul dhe Adam dhymm koela, my an drosa dhe baynys, na dheffa dhe'n nev nevra, mara mynna dhymm koela. Saw Eva mynnav 'ssaya. Hi yw esya dhe doella es Adam, yn gwir yn ta, ha moy sempel. Ynwedh ny dal dhymm bos gwelys ow honan y'n keth shap me. Hager yth ov difashes, ny yll tra bones hakkra. Hwi oll a'm gwel. Hager lowr os, my a'n 'vow. Yn mysk oll an dhewolow nyns eus hakkra. Rakhenna hwila neb jynn, po an viaj ny dal oy. Eva, dhiso a dhegren mar euthek pan wello hi dha figur y'n keth dell ma. Ha mar kwreta bargen sur ty a vydh lower enorys awos Dyw, kynth ywa fur. Yn for' ma mar pydh toellys my a vydh kompes ganso. Na borth dout, my a'n prevent, ha'ga dri lowr dhe baynys. My a lever dhis fatla. An Tas a wrug der entent, yn mysk oll pryves y'n bys, formya pryv henwys serpont; hag yth yw wondrys fashes, dhe virgin deg pur haval. Sotel yth yw gans henna, a-ugh best na pryv y'n bys. Yn henna mynnav entra, ha privedh dhe baradhis my a vynn mos heb fyllel. Kyn na woer hi kows banna my a's rewl hi dell vynnav, ha kyns es dos alena dhe Adam ha dhe Eva my a wra neb anfeusi. Gwra yndella, my a'th pys, par dell osta jowl wili. Mar kwredh henna, enorys ty a vydh bys vynari, ha penn rewler warnan ni heb dout y'n kas. By and by thou shalt see that; ha pur uskis gwrav an pratt dhe'n serpont, yn spit dh'y fas. Ay! Re debel-diwetthi! Gorta ha bydh dhymm rewlys! Gas vy dhe entra a-ji, rag ty ny vydhydh doutys drefenn dha vosta mar deg. Ty a vydh yntertaynys ha gans Eva sur krysys. Dha fisment dhedhi a bleg. A-ban oma klos entrys ynnos jy a-barth a-ji, ow voys oll otta chanjyes, avel maghteth yn tevri. My ny vydhav konvedhys ow bos ynnov falsuri; sotel lowr ov, my a grys hag a vynn mos, heb gul gik, y'n wydhenn pur smodh, heb mik, avel el hweg afinys. My a vynn mos dhe wandra omma yn mysk an flourys. Oll pub plesour a'n bys ma y'n plas ma otta tevys, mayth yw konfort dhe weles. Eva, prag na dheu'ta nes, rag kows orthiv ha talkya? Unn dra a wonn a'm godhvos - pur lowenek a'm gwressa koela orthiv a mynnes. Piw osta jy eus y'n wydhenn a-wartha gans tros ha kan? Marth yw genev dhe'th klywes. Orthis my ny'm beus negys, h'a byle os devedhys. Marth yw genev dha weles. Na gemmer marth vydh, benyn 'vas. My a dheuth a-dhiwedhes mes a'n nev gans hast pur vras, rag kewsel dhis a henna omma lemmyn pur brivedh. My a'th pys, awos neb tra na gemmer marth anodho, nag own vydh orth ow gweles. Nyns eus own dhymm ahanas, drefenn bos mar deg dha fas, na hwath dout vydholl y'n bys, rag der dha er yth 'valsa ty dhe dhos a'n nev toeth-ta, ha mara teudh alena pur wolkomm yth os genev, ha dhe well y'th fydh kresys. Lavar dhymmo dha negys, ha mar kallav dha weres, na borth dout, ny vydh neghys. Ow negys a dreyl dha les mara mynn'ta ow krysi saw yma dhymm ahanas dout pur vras a anfeusi mara kwres ow diskev'ra. Na vynnav dha dhiskev'ra, ow hothman, a dra y'n bys. Rakhenna, meur dha volder, ty a yll gul dha negys, hag ow threst yw y vos da. Da koedh, yw. Na dhout peryl war ow honesty, benyn 'vas. Poken y hwrussen fyllel, hag y fia pegh pur vras ha my gwiw dhe vos punshys. Hwi a lever gwir, dremas. Henna 'via hager dra. Yma dhymmo hireth bras rag godhvos pandr'a via! Yn kott termyn agas negys kewsewgh, y praydha. My a lever dhis, Eva, ha koel orthiv 'wos eghenn. Maga fur ty a via, avel Dyw eus a-wartha, hag a wodhvia pub tra. Mighal! Syrra, dhywgh gromersi! A kallen dos dhe'n prykk na y halsen bos pur veri. Henna 'via rial dra, bos koth dhe Dhyw a-wartha hag yn pub poynt ekwal ganso, ha maga fur akontys. Y'n eur na, re Sen Devri, y hallsen routya pur gay, ha bos statly dhe'm devis. Y praydha, lavar fatla. Perthi ny allav pella! My a vydh sur dhe lakka mes ty dhymm a lavara yn by and by. Skians benyn yw brottal, ha my nyns ov over-sotel. Lavar dhymm kyns es hedhi, my a'th pys, an nowedhys! My a lever dhis, Eva, mar kwredh tastya an frut ma eus omma war an wydhenn, maga fur ty a via avel Dyw eus a-wartha yn nev ughel a-ughon. Gow vydh ny lavarav. What! Yw henna dha dhevis! Tamm vydh ny vydh kresys henna, my a lever dhis. Dhe'th kusulyow y'n poynt na, my a lever dhis praga. Dyw a or'nas kontrari na dheffen tastya henna. Ha'y gommondment pur dhevri a ros straitly, dres pub tra na wrellen mellya worti. Prag y hwredh genev flattra? Goslow, goslow, Eva, ha deus nes; sham yw genev dha glywes ow krysi dhe'n geryow na. Praga, my a lever dhis, y hwrug Dyw ri an charj na? Genes a peva tastyes, maga fur ty a via yn pub poynt sur avello. An Tas, ev ny vynnsa sur orth den vydholl bos mar fur dhe wodhvos a dhrog ha da. Rag henna, benyn 'vas Eva, genes ny vynnav flattra na ny vynnav usya gow. Koel jy dhymm, men dhe geski, mar mynnta bos eksaltys, poken sertan vynari hwi a vydh avel fleghes. Bo yn assentys ty a glyw, Eva jentyl. Eya, eya, my a glyw. Hag y ros dhyn charj mar strait, ma'n bydh payn ha galarow mara kwren terri unn jet y gommondement dhyn res. Par happ yn ifarn nevra ni a'n bydh agan trigva, mar ny vydh y vodh sywyes. Taw, taw, Eva, yth os fol; ny vynnydh koela orth da. My a ragdho; ty a'n oel ow husul mar kwredh nagha. Genes nyns ov kontentys. Na vea my dhe'th kara, ny vynnsen dhe'th kusulya dhe vos bargen mar vras gwrys. A kothven y vosa gwir, my a sywsa dha dhesir drefenn ty dhe dhos a'n nev. Hwi a lever gwir, benyn 'vas. Ny res dhywgh ow mystrestya: a'n nev ny dheu mes tus vas; my yw onan a'n sort na. Rewgh hwi rann dh'agas dremas, po an viaj ny dal tra, ma's y bart ev a'n jeffa Ny vynnav bos mar grefni dhe witha oll ow honan. Adam sur dres pub huni my a'n kar, po Dyw difenn dhe witha heb y shara. My a ystynn an skorrenn; kemmer an frut anedhi. My a wra yn pur sertan. Ny allav nep-pell perthi, pan vo res tastya anedhi. Nevra ny gemmer dout, ty a yll bos pur veri. Gans dha lagasow a-les ty a wel pub tra omma, ha pur fur ty a vydh gwrys, avel Dyw; na dhout henna, Eva, my a lever dhis. Na vea my dhe'th kara, ny vynnsen awos neb tra yn-bann dha vos eksaltys. Meur a ras dhy'hwi, syrra, ow ri kusul dhymm mar stout. Orthowgh my a vynn koela, ha, by God, nyns eus dhymm dout dhe dastya an keth aval. Ha'w dremas a woer dhymm gras dhe wul viaj mar nobyl, ha, re Dhyw an Drynses Tas, ev a'm sett yn-bann ughel, hag a'm gormel meur, heb dout. Ke yn kerdh, Eva benyn 'vas, ty a yll godhvos dhymm gras rag an vyaj. Hag Adam, dell yw dremas, ahanas a wra pur vras. A'n bargen ny vydh edrek. Farwel, ow hothman a'n nev; My a'th kar bys vynari. Dhe Adam kerdhes pur grev my a vynn, dh'y salusi, ha'n aval y bresentya. Gwra yndella, my a'th pys. 722/ Ty a glyw ken nowodhow kyns ow gweles vy arta. Adam, Adam, pyth es'ta? Goslow dhymmo ha deus nes. Yma genev dhe'th plesya - Na borth dout a bratt eus gwrys may hwodhves dhymm grasow. Wolkomm, Eva, os, benyn 'vas. Mars yw an nowodhow da ty a vydh rewardys, ha'm kolonn ynwedh ganso ty a vydh prest dhe'th plegadow. Mirewgh, mirewgh orth hemma! 'Tomma, gay a aval dhis! Mar kwredh tastya anodho ev a dreyl dhiso dhe les, moy es milyow a beunsow. Deus nes. Gas vy dhe weles maras ywa aval da. Lavar ple feva kevys. Praga, Adam ow fries, dar, dout eus dhis y weles? Lavar dhymmo, my a'th pys. Ny bleg dhymm syght anodho dout pur vras yma dhymmo nag ywa 'vas, my a grys. Ty, mar pe hemma terrys mes a'n wydhenn difennys ragdho my a vydh grevys. Nevra na dhout a henna, Adam hweg, ow herensa. My a lever, dhis mar pleg, yn pan vaner y'n beuma. Syrra, ha my ow kwandra, my a glywas a-wartha war an wydhenn unn el hweg sur ow kana. My a'm beu wondrys fansi orth y weles y'n wydhenn. Ha dhe-vy yn kortesi y profyas, avel kothman, meur a daklow, re'm lowta, ha pur wordhi. A Ev', Ev', ty a fyllis, ow koela orth an el na. Drog polat o, my a grys, neb a glywsys ow kana, ha'th kusulyas dhe derri an aval na. Syrra, ev a gewsys dhymm mar deg, ny wodhyen tamm y nagha, ha'y bromys o mar hweg, may hwrug ev dhymmo koela. Ny dhoutis, war ow ena, a falsuri. Ha'y bromys yth o larjya! mar kwren tastya an frut na avel Dyw ny a via ha maga fur. My a fylli y'n eur na. A kallen dos dhe'n prykk na y fia bargen pur fur. A, out, out warnas Eva! My a yll kussya henna! Tewlys on ni dhe veshyf bras, ha wordhi dhe gemmeres. Henna o hager vargen, Eva, my a lever dhis. Nebes lowr a vydh an gwayn pan vo genes kowl komptys. Soweth, ellas! Taw, Adam. Na vydh serrys. Ny dheuth drog hwath anodho. An keth peryll y toutis, hag a leveris dhodho oll an peryll yn pub poynt saw ev dhymm a warrantyas nag o dhymmo dout y'n kas, war y beryll, wondrys koynt. A, molleth dhe'n horsen kamm, ha dhe'jy ynwedh ganso! Ni a'n jevydh sur droglamm rag dha viaj y'n torn ma, ha wordhi dhe gavoes blam. Ye, ye, my a'n jevydh oll an blam dhiworthis jy lemmyn Adam, pynagoll fordh yth a an gam. Saw a pen ni dywow gwrys ny vies malbew serrys, my a woer henna yn ta. Taw, taw, na vydh dhymmo mar wokki. An serpont o re wili ragos jy y'n keth torn ma. Ev a brofyas lowr gow dhis, ha genes ymons krysys. Ow geryow a vydh prevys may fydh lowr payn ragdho. Ye, yth osta jy den fur, ny vynnes orthiv koela. Mar ny vydhav ow desir nevra ny'm gwelydh omma, medhav, unn spys. An el esa y'n wydhenn y kewsis geryow efan, ha my a'n krys. Syrr, war nebes lavarow, tast jy part a'n avalow, po ow herensa ty a gyll. Mir, kemmer an aval teg po sur ynter ty ha'th wreg an gerensa kwit a fyll, mar ny vynnydh y dhybri. Henna yth yw truedh dra, a-ban res dhymmo koela po kelli an gerensa eus ord'nys ynter-ranna. Eva jentyl, na vydh serrys. My a wra oll dell vynni. Dro-va dhymmo desempis, ha my a wra y dhybri. Eya, gwra dhymm yndella. 'Dra vyn byw ow herensa ty a vydh bys vynari. Mir an aval ma omma. Kemmer ha deber toeth da, dout my genes dhe serri. Ogh, ogh, tru, my re beghas, ha re dorras an difenn! A, debel venyn heb gras, ty re'm toellas vy heb ken! Agan korfow noeth gallas. Mir warnan pub tenewenn! Omgwetthyn ni gans del glas agan privyta pur glos. Y hwonn gwir. Dyw agan Tas y sorr dhyn y teg pur vras, my a'n soppos. Mir, mir, a'n gwel'ta, Eva? Yma ev ow tos omma. Rag meth, deun ni alemma dhe gudha yn tyller klos. Adam, Adam, pandr'a wredh? Prag ny dheudh dhe'm wolkomma? Drefenn ow bos noeth heb kweth, ragos yth yth dhe gudha y'n tyller ma. Piw a dhiskwedhas dhiso dha vos noeth treys, korf ha bregh, lemmyn an frut gras na'th fo mones dhe dhybri heb pegh? Prag y hwruss'ta yndella? Dhymmo vy hwi a ros gwreg. Honna yw oll dhe vlamya. Hi a dorras an aval teg hag a'n dros dhymm dhe dastya. A-ban goels'ta orti hi, ha guthyl dres ow difenn, yn hwys lavur dhe dhybri ty a wra bys y'th worfenn. Eva, prag y hwruss'ta jy toella dha bries heb ken? An serpont der falsuri a'm temptyas dhe wuthyl henna, hag a bromysyas dhe vy y fedhen dhe well nevra. Hemma yw gwir. Rag ty dhe goela orto, ha toella dha bries lel, nevra gostydh dh'y gorti my a orden bos benyn. Trest jy dhe'm ger. May foghho y lavur hi der wul ow gorhemmynn trogh, na heb meur lavur devri bynytha ny's tevydh flogh. Prag y hwruss'ta, milligys, lavar, aga thoella i? My a lever dhis an kas: rag bos dhedha joy mar vras, ha my pub eur ow leski. Serpont, rag aga themptya, meur a bayn eus dhis or'nys. Milligys os dres pub tra, ha dres pryv ha best y'n bys. Own ahanas rag nevra den a'n jevydh prest pub prys. Ha ty, pryv, a wra kreupya, ha slynkya war dor a-hys. Ynter hy has hi ha ty my a wra envi nevra, ha henna dhe'th penn dhejy dhe'n dor sur a wra kropya. Ottomma hager viaj, may hallav kyni "Ellas". Yth ombrevis gwann diek, mayth ov 'poyntys dhe bayn bras, dhe bytt ifarn, ow chyf plas. My a vynn dalleth kreupya, ha slynkya war dor a-hys. Dhe'm shap ow honan ottomma hwi a wel, oma treylys, drog polat ha bras. Kyn na'm bo-ma lowena, an chorl Adam, hag Eva, dhe ifarn y tons dhymmo, ha'ga yssew, rag nevra, 'poyntys der anow an Tas. Ha'n serpont triges ena. Nevra ny dheu alena, rag yth yw milligys bras. A Das, Dyw y'th wolowys, a-ban ov dhe dhrog tewlys, gront dhe'th kreatur, my a'th pys, nep part a Oyl a Versi. Adam, kyns es diwedh an bys my a wront Oyl Mersi dhis, ha dhe Eva dhe'th wre'ti. Saw, pur wir, dhymmo vy krys, orth dha wreg drefenn koela, rag terri an keth frutys a wrug difenn dhiworthis, spern y teg dhymm ha spedhas, ha'n erbys a'n keth dor na ty a dheber yn dha hwys dhe'th vara, pur wir nevra, erna ves arta treylys. An keth dor kyns a wruga. A dhoust omma y feus gwrys, ha dhe dhoust yth edh arta. Dha vodh re bo kollenwys, Arloedh Nev ha'n Bys keffrys. My a yll bos lowenhes, kyns es bos diwedh an bys, kavoes an Oyl a Versi. Kynth yw paynys ow kortos yn ifarn yn neb plas, ni yw neb a'n dendilas drefenn an difenn terri. Mighal, yskynnewgh, el splann, helghyewgh Adam gans kledha dan, ha'y wreg, mes a baradhis. Ha dew gweth dhedha gwra doen, dh'aga hudha pub seson, aga noetha na vo gwelys. Arloedh, my a wra henna. Parys yw genev pub tra dhe vos dhedha alemma. Adam, ke yn-mes a'n wlas, dhe gres an bys dhe vywa; ty dha honan dhe balas, dha wreg genes dhe nedha. Adam, ottomma dillas, hag Eva, dh'agas kwetha. Fistenewgh, bedhens gwiskys. Fistenewgh troha'n daras, rag omma ny wrewgh triga. Agas toulys dhe balas, ha'gas pygans dhe nedha ottens parys. My yw kannas Dyw, Ankow, omma dredho apoyntys. Rag terri gor'mynnadow dhe Adam gans Dyw or'nys, ev a verow, ha'y yssew. Yndella yth yw 'poyntys dhe vyns a vywo y'n bys my dhe ladha gans ow gyw. Adam na Eva peggha ha difenn an Tas terri, mernans ny wrussens tastya mes yn plesour vynari i a wrussa prest bywa. Omma ev yth o 'poyntys chyf warden war baradhis, ha der begh ha kovaytys oll y joy yth yw kellys, may fedha paynys ragdho. Gans an jowl y fons toellys der an serpont milligys, dell welsowgh warbarth omma. Henna yth yw truedh bras, der an serpont milligys ni dhe vones mar wokki mayth yw kellys dhyn an plas o or'nys dhyn, leun a joy, dhe vywa omma nevra. Lemmyn, Eva ow fries, henna yth o dha foli jy. Rakhenna paynys pur vras yma or'nys ragon ni, may hyllyn kyni dredha My ny wodhyen gul dhodho. Kemmys geryow teg a'm prev. Der henna, war ow ena, my a sopposyas el nev yth ova dannvenys dhymm. Syrra, kyn foma kregys, y flattering o mar loryus ny wodhyen guthyl nahen re'm lel lowta. A, soweth, ty dhe grysi dhe'n jowl bras ha'y anfeusi! Rag yth o ev re wili pan edh y'n serpont a-ji rag dha doella. A-ban oma kowl diglos hag a baradhis helghys, my a vynn dalleth palas rag kavoes sosten ha boes dhymmo vy ha dhe'n fleghes, hag aparel a dhillas. Ynwedh my a vynn nedha, rag gul dillas dhe'm kudha ha dhe'm fleghes eus genys. Ellas, gwev pan ova genys, ow terri gor'mynnadow Dyw! Helghys on a baradhis dhe'n norvys, er agan gew. Tra vydholl a wrella les ny gavav omma neb tu, na sosten, moy es bestes. Fatell wren omwitha byw? Nyns yw hemma paradhis, a, nag yw, Adam, nag yw! Ena yth esa flourys ha frutys, teg aga liw, dh'agan maga, orta mires pan wrellen. Chanjyes yw an rewl lemmyn; ellas orth an pryv koela! Dew vab yma dhymm genys, ha tevys yth yns dhe dus. Hwi oll a's gwel. Kaym yth yw ow mab kottha, Abel yw ow mab yonka, fleghes uvel ha jentyl. My a vynn dhy'hwi 'poyntya servis dhe'n eyl ha'y gila, rag rewlya ys ha chatel. Kaym, dha jarj jy a vydh war gergh, barlys ha gwaneth, dhe wuthyl an dega lel hag Abel, an oblashyon war an bestes ha'n oghen, ha'n devesyow oll y'n gwel. Ha pan vo res degevi gorrewgh i dhe'n Mont Tabor, hag ena gwrewgh aga leski, dout Dyw genowgh dhe serri mar ny wren oblashyon lel. Adam, ow thas karadow, my a wra heb falladow dha worhemmynn yn tien. Res yw, porres lavurya ha gonis y'n bys omma dhe gavoes dhyn ni sosten. Mos dhe'n menydh my a vynn ha gul an dega lemmyn, ha leski homma pur glan. Ha'n degves oll a bub tra, oblashyon sur anodho, my a'n dyllo oll gans tan. Y leski ny vynnav vy, an ys na'n frutys devri. Taw, Abel, dhymmo, penn-koeg! My a guntell dreyn ha spern ha glos dhe leski heb bern, hag a wra bush bras a vog. Kaym, nyns yw henna gwrys 'vas. Yn gordhyans dhe Dhyw an Tas, gwren agan sakrifis lel. Dyw a dhervynn bos gordhys gans an gwella frut pub prys. My a'n gwra, awos merwel. Kaym, ow broder, mir ha preder. Hemma yw mog hweg. Taw, dhe'th kregi! Hemma yw gwell devri ty fol krodhek. Ny yll bos, pan wredh gans glos dha sakrifis. Re Dhyw a'm ros, mynnsen dha vos ughel kregys! Rag erya, sur er ow fynn, my a'th wysk, harlot jowdyn, mayth omhwelli dhe'th kilbenn! Kemmer henna, ty blos adla, war an challa gans eskern an challa! A tru, ellas! Ty re'm ladhas, Kaym, ow broder. Y'n bys ma rag dha wrians ty a berth sur gessydhyans; ken na breder. Otta marow, horsen chorl! Ny vynnav bos kontrolys. He is now rid out of the world. Y fynnsen y vos kudhys yn neb toll ke. An gwas a vynnsa leski agan ysow, yn tevri. Ni yllyn perthi henna. Dhe Dhyw nyns eus edhomm vydh awos kavoes agan pyth, my a woer gwir. Ow thas, kyn fo-va serrys pan glywo an nowedhys y vos ledhys, my, yw er, ny synsav poynt. Mirewgh py'mava tewlys, yn kledh dhe vones pedrys! Ny'm beus edrek vydh y'n bys, a'w dorn kynth ywa ledhys par dell oma gwikor koynt. Kaym, dhymmo, py'ma Abel? Ow gorthybi uskis gwra. Ny wonn, Arloedh, diogel. Henna ty a woer yn ta. My nyns ov warden dhodho. Perhaps, bleydh, so mote I go, a'n ladhas pols alemma, an harlot plos. Koth yw ev hag avleythys. Pan na yll e omweres, y vaw ny vynnav bos. Otta, voys mernans Abel dha vroder, prest ow kelwel a'n dor warnas pub tyller. Milligys nevra re bi; hag oll an tir a biwvi yw milligys y'th ober. Frut da bynner re dhokko, na dader arall neb prys. Ow molleth y rov dhiso; molleth ow Mab ha'w Spyrys dhiso kemmer. Dha voys, Arloedh a glywav, saw dha fas my ny welav, sur er ow gew. Moy yw ow gwann oberow hag ynwedh ow feghosow es dell yw dha versi, Dyw, dhymm dhe ava. Lemmyn difreth ov ha gwag, pur wir dres oll tus an bys. My ny wonn leverel prag gans peub na vydhav ledhys ewn rag an keth ober ma. Kaym, na vydhydh yndella rag dha ladha den mar kwra ev a'n jevydh seyth kemmys. Token warnas my a wra. Henna gwelys pan vova ny vydhydh gans den tochys. My a vynn mos dhe'm syrra, dhe weles pana fara a wra ev a'n nowedhys. Now God speda dhis, ow thas. My a wrug oblashyon bras, hag a loskas showr a ys. Henna yth o gwrys pur dha. Py'ma Abel, kows henna: dar, nag ywa devedhys? Anodho mars eus preder, orth y withyas govynn e. A wrug kelli y vroder? My a'n syns gweth es boekka; Ny wonn pyth eth dhe wandra. Hemma yth yw gorthyp skav. Yma ow kul ow holonn klav orth dha glywes y'n torn ma. Ty re'n ladhas, re'm lowta! Ow molleth dhis rakhenna, ha molleth dha vamm ganso ty a'fydh sur maga ta. An nowodhow pan glywvo hy holonn terri a wra. Emskemunys dell o'ta, kwykk yn kerdh ke alemma. Ny borthav gwel ahanas, rag kavow sevel a'm sav. War dhor lemmyn omhwelav. Ow holonn 'ter dew gallas. Emskemunys lowr yth ov, nyns yw res 'skemunya moy. Ny'th anniav, perth jy kov, nag ow dama, yn tevri. My a vynn kyns es hedhi mos alemma ha gwandra a-dro y'n pow. Kemmys yw an mollothow dout yw dhymm kavoes trigva. Adam, pandr'a hwer dhy'hwi, yndellma bones serrys? Yn ow holonn pur dhevri yth oma pur dughanhes orth dha weles y'n stat ma. A Eva, ow fries ker, ow holonn yw ogas trogh. Oll ow joy yth yw pur wir kellys, der mernans ow flogh neb a geryn an moyha. Syrra, ny wonn konvedhes agas dughan yn neb for'. Agan dew vab, dhe Dhyw gras, yth ens pur vyw - bydh na sorr - hwath nyns yw pell. Kaym hag Abel, ty a woer, or'nys yns dhe Mont Tabor dhe wul offrynn, diogel. Ha mir, Kaym otta ena, devedhys dhe dre toeth ta. Rag henna sav, y praydha, ha gas kavow dhe wandra. My ny brederav gwell for'. Eva, nyns yw dhe geles an ober ma dhe weles. Ledhys yw Abel. Na sorr! P'ywa? Abel yw ledhys! Dyw difenn y vosa gwir! Nyns eus den vydholl y'n bys dhe wuthyl an keth murder, mes ty ha'w mab kottha Kaym. A, gans Kaym emskemunys ow mab Abel yw ledhys, mayth ov genys dhe veur bayn. Sorr Dyw ha trobel pub tu yma pub eur ow kressya y'n bys ma. Hedra vyn byw ov sur y hwra paynya. Ny'm beus joy a dra y'n bys. Out, ellas, pandr'a vydh gwrys? Hemma yw yeyn nowodhow. Ow holonn yth yw terrys; Fynnsen ow bosav marow. Soweth bythkweth bos formys! A, ty Kaym, emskemunys, ow molleth dhiso pub prys! Henna o gwann-ober gwrys, may ma Dyw ha'n nor keffrys warnas pub eur ow kria. Rakhenna, wosa hemma, nevra ny wren rejoysya, mes pub eur oll ow mornya heb joy vydh na lowena der dha wann-ober omma. Rakhenna voyd alemma, na hwila agan 'nia, mab mollothow par dell os. Ow molleth dhiso pub prys, ha molleth dha das keffrys ty a'fydh y'n jydh ha'n nos. My ny wrav vri a henna. My a lever dhis, dama, kemmys mollothow omma, my a woer! Ny sewenav nevra y'n bys. Rakhenna mos alemma my a vynn; ny wonn py le. Malbew edrek eus dhymmo an chorl Abel 'wos ladha, rag bythkweth my ny'n kerys. Avoydyama. Kuntell warbarth ow fygans: my a vynn mos pur uskis ha wosa hemma dihwans, pell y'n difeyth dhe wandra. A Kaym, Kaym, ow fries ker, ty a wrug pur dhrog ober dhe ladha Abel, den da. Dha own vroder yth ova, ha'w broder vy maga ta. Rag henna erbynn kinda yth o dhis mos dh'y ladha. Sorr Dyw yma dhyn ragdho. Tetivali! Bramm an gath! Nyns eus edrek dhymmo hwath awos an keth ober na. Ow fries, gwellha dha jer. Gas dha oela ha'th usa. Gwren grassa dh'agan maker a'gan lavur y'n bys ma; ni a'n dendilas, ha moy. Rakhenna, wosa hemma, yn chast gwren ni kesvywa; ha carnal joy y'n bys ma ni a vynn warbarth nagha, der vodh an Tas a Versi. Adam, na wredh yndella bywa y'n keth ordyr na. Dha has a wra ynkressya heb nomber dhe akontya. Yndella yth yw apoyntys. Ty a 'fydh mab dineythys a'th korf sur, na wra doutya. Henna a vydh haval dhis na yll den bos havalla, ha genev y fydh kerys. Arloedh, bennigys re bi, orth ow gwarnya yndella. Dha volonjedh pur dhevri re bo kollenwys nevra. Kalmana ow hwoer, fisten, gas ni dhe vos alemma, rag nans yw hi prys yn tien mayth yw res yn kerdh vyajya. Degyn genen agan pygans, par dell osta ow fries ha'w hwoer a-barth mamm ha tas. Gallas genev sorr an Tas rag ladha Abel penn-bras, ynwedh molleth mamm ha tas res yw dhymmo, moy es kans. A, Kaym, ty a fyllis meur rag guthyl an keth ober; ragdho yth os milligys. Agan tas ha mamm Eva lowr ymons i ow mornya. Gansa ny vydh ankevys an murder bys vynari. Kemmys yw gansa mornys, aga holonn yw terrys rag kavow, bedhav y di. Awos henna ny wrav vri; na anedha i bydh moy, my ny settyav gwel-gala. Genev lowr i a sorras hag a'm mollethis mar vras na sewenav, gonn yn ta, nevra y'n bys. Rakhenna deun alemma yn pellder dhiworth ow thas. Y'n koesow mynnav bywa, po yn bushes ha brakes bras; rag ny besyav bos gwelys awos mernans. Rag an murder o mar vras ny yll Dyw dhymmo gava, na ny vedhav yn neb kas dhe'n Tas, awos diskudha, unnweyth dhe hwilas gevyans. Yn henna yth os dhe vlamya. Dyw a settyas merk warnas, ewn yn korn dha dal omma, hag yndellma y leveris, an geryow ma, dhevri: Pynagoll den a wel henna hag a wrello dha ladha, ev a's tevydh seyth plag moy. A'n promys my ny rov oy. Y drestya ny vynnav vy dout bos toellys. A-ban yw pub tra parys, deun ni yn kerdh kekeffrys, pellder a-dro y'n bys. Ha'gan fleghes kekeffrys, hwath kynth yns i mar vunys. My a dheg rann war ow heyn. Uskis lemmyn! Gwra yndella, my a'th pys; my a led an vow's a'm dorn. Ow holonn yth yw terrys, that since the time I that I was born bythkweth my ny'm beus moy dughan. Gordhys re bo Dyw an Tas! Mab dhymmo yma genys, ha tevys dhe baja bras. Seth ow mab yth yw henwys. Hwi a'n gwel: Otta omma. My a bys dhe'n lel Drynses hedra vo omma y'n bys dhe vos lel servont dhodho. Adam, my a lever dhis, dha vab Seth yw dewisys genev prest dhe'm servya vy. A skians y fydh lenwys, hag a gonnyk maga ta. Ny vydh skians vydh y'n bys mes y aswonn ev a wra dre'n an planetys, mes ha chi. Der howl ha ster a-wartha ev a wra oll dissernya a'n pyth a vydh wosa hemma, kekeffrys a dhrog ha da. Meur wordhyans dhis, ow Formyer, ha gwrier a oll an bys. Yth os-ta Arloedh heb par. Yn pub plas re bo gordhys. Neb a'th enor ny dhrog-far. Yn Seth re bo kollenwys par dell vo dha vodh nevra omma pur grev. Ha my ynwedh, Arloedh nev, a'th lel-wonis dell vo res, par dell osta Arloedh krev. Hedra vyn omma y'n bys, klyw jy ow lev, ma'm boma gras wosa hemma dhe'th weles yn lowender, gans dha eledh a-wartha, ughel yn nev. Pes! Goslowewgh, a-derdro, orthiv vy myns eus omma. Lamek yth yw ow hanow; mab yth ov, krysewgh dhymmo, dhe Vantusale forsooth. A Kaym, mab Adam yth ov sevys a'n seythves degre. Arloedh bras synsys, yn prof. Ny'm beus par, sur, yw byw; peub a'm enor par dell goedh. Drog polat ov, re'm lowta. Nameur a dorn da ny wrav, mes pub eur oll ow pylla an dus wann mara kallav. Ow fansi yw henna. Hwath kynth yw ow hendas Kaym pur bad den lowr akontys, my a'n kemmer yn disdayn mar ny vydhav vy prevys hwath meur lakka. Moy es unn wreg dhymm yma dhe'm plesour rag gul gansa. Ha sur my yw an kynsa bythkweth a veu dew wreg. Ha'n mowesi lowr plenti yma dhymm. Nyns yns denti. My a's kyv pan vynnav vy; ny sparyav anedha i, malbew onan a vo teg. Saw yth ov wondrys troblys. Skant ny welav unn banna. P'yw an jowl! Pandra vydh gwrys? My ny wonn, war ow ena, na hwath ny gavav gweres. An plesour eus dhymm y'n bys yth yw gans gwarak tenna. My a vynn mos pur uskis dhe'n forest kwykk alemma, ha ladha an stranj bestes. A'y us kig an bestes na, na a vest na lo'n y'n bys ny wrussen bythkweth tastya. Na hwath kig genen dybrys, na gwin ny usyen banna. Vytel arall dhyn yma, ha pygans lowr dhe vywa. Gans kreghyn an bestes na my a wra dillas dhymmo, par dell wrug ow hendasow. Ha'w hendas Kaym, hwath yw fyw y'n difeyth; yn mysk bestes yma ev prest ow pywa. Drefenn serri an Tas Dyw tewlys yw dhe veschyf bras, rag drog polat par dell yw ha lenwys a vollothow. Ow servont, deus nes omma, ha'w gwarak dro hi genes. My a vynn mos dhe wandra bestes wyls dhe aspia, hag a vynn gans ow sethow ladha part anedha i. Agas gwarak ha sethow genev ottensi parys. My a's led bys y'n koesow, hag ena y fydh kevys plenti lowr, yn pur dhevri. Gans peub my yw ankevys. Ny'm aswonn nameur a dus. Kaym my a vydh henwys, mab kottha Adam, tewlys, hwi a wel, dhe veschyf bras. Hwath ow holonn yth yw stout awos ladha Abel lout. Na hwath, 'wos molleth an Tas, ny'm beus edrek vydh y'n bys. Hwi a'm gwel: overdevys yth oma warbarth gans blew. Ny besyav bones gwelys gans mab-den y'n bys ma byw, drefenn ow bos emskemunys. Ha'w thas Adam y volleth gallas genev, ha'y sorr bras. Drefenn henna, yn neb plas ny allav kavoes powes. Mab mollothow yth ov gwrys. Der henna my ny vedhav dos yn mysk pobel neb prys, mes pub eur owth omwitha yn koesow hag y'n bushes, avel best prest ow pywa. Ow foli yth yw mar vras, ha'w holonn ynwedh pur brout. Ny vynnav dhiworth an Tas hwilas mersi, sur heb dout, kyn na'm boma lowena. Own yma dhymm a bub den, ganso dhe vones ledhys. Saw an Tas Dyw y honan y verk warnav a settyas, poran gans y own diwla. Hwi oll a'n gwel. Hag y kewsis yndellma, na wra den vydh ow ladha, erbynn y dhisplesour lel. Hag ow ladha neb a wra, seyth gweyth y hwra akwitya. Y kewsis, gans charj pur grev. Saw hwath, 'wos an promys na, meur yth esov ow toutya y vennath dhymm ny vynn ev. Rakhenna, war ow ena, my a vynn mos dhe gudha yn neb bush, kynth yw dhymm grev. Mester da, der dha gummyas, my a wel unn lo'n pur vras yn-hons yn bush ow plattya. Syrra, yn mysk an bestes stranj yth yw ev dhe weles. Mirewgh, mester, py 'ma-va. Bydh war dhymm na vova den, rag my ny allav medra. Sett ow seth dhe denewenn, may hallen tenna dhodho. Na berth dout, y fydh e gwyskys. Nevra na wrewgh hwi doutya, ken es best nag yw henna, ha stranj yw dhe vos gwelys. Now, otta an seth kompes. Tenn hi yn-bann bys y'n pil, par dell os archer prevys hag a ladhas moy es mil a vestes kyns es lemmyn. Now otta an seth tennys, ha'n best sur yma gwyskys! Y vernans gallas ganso! Led vy kwykk bys yn dhodho, may hallen vy attendya pan vaner lo'n yth ywa. Out, ellas, my yw marow! Ny'm beus bywa na fella! Gwenys ov der an asow, ha'n seth gallas kwit dredhov. Pur ogas marow yth ov! Par dell veuma ongrassyes, lemmyn yth oma plagyes, dell welowgh hwi oll an prov. Out, ty vilen, pandr' eus gwrys? Sur hemma yw den ledhys. My a'n klyw prest ow karma. Ow karma yma an best! My a'n gwel ow trebuchya. Gallas ganso hager fest! Roy y groghen dhymm, I pray thee, dhe wul kweth dhymm dhe wiska. Blewek koynt yw ha hager. Ny wonn pan vest ylla bos. Yth 'valsa orth y favour y bosa neb boekka nos, ha henna y fydh prevys. Gorta, gas vy dh'y dava, drefenn gweles mar nebes. Pyw osta lavar dhymmo mars os den po neb best bras. Dout ahanas dhymm yma. A soweth, emskemunys, my yw Kaym, mab dhe Adam. Genes yth oma ledhys. Molleth dhis dha das ha'th vamm, ha'w molleth vy gans henna. P'ywa! Ty yw Kaym, mab dhe Adam! Ny allav krysi henna. Di'velebys os ha kamm, overdevys oll gans henna yth os, gans blew. Prag yth os'ta yndellma y'n bushes ow krowedha? Marth bras yth yw. My ny allav konvedhes dha vosta jy ow hendas, na kar vydh dhymm, yn tevri. A'm korf yth os devedhys, hag a Adam dha hendas. Lemmyn yth os milligys, ha seythplek ty ha'th fleghes a vydh plagyes, krys dhe vy. Merk Dyw warnav yw settys. Ty a'n gwel yn korn ow thal. Gans den pan vo konvedhys orthiv vy sertan ny dal bos mellys awos neptra. Ty a wel, veri nebes banna ny allav gweles dhe vos akontys, re'm lowta. Prag y hwrug Dyw settya merk yn korn dha dal, dhymm lavar? Kyn firen warnas mar stark ny welav meur a'th favour, na merk vydholl y'th tal. My a lever heb y di: genev Dyw a wrug serri ha'y volleth, yn pur dhevri, dhymm a ros, drefenn ladha ow broder. Abel o henna. Preder, mara mynnta, y wodhvos. Der henna, my a dhoutyas gans peub y fedhen ledhys. Saw Dyw dhymmo a wrontyas - war y dhisplesour ev res - ny vedhen yn kettella; ha pynagoll a wra henna, plagyes y fedha ragdho. Ha'y verk y settyas omma, yn korn ow thal, rag tokyn. Ha genes, emskemunys, o my dhe vones ledhys, ewn a'th tiwla jy lemmyn. A, soweth gweles an prys genev dha vosta ledhys, mars yw ty Kaym ow hendas. Ow boya o dhe vlamya: ev a or'nas dhymm tenna, ha my, ny welyn banna mes nebes, pur wir yn fas. A Lamek, drogwas yth os, ha my ynwedh, meur lakka. Hemma o venjans pur vras, ha just plag or'nys dhymmo; soweth an prys! Kaym, hwath kynth o'ta ow hendas, dha aswonn my ny wodhyen na ny wrugav dha weles nans yw sur lies blydhen drefenn bos di'velebys. Di'velebys ov pur veur, hag overdevys gans blew. Ow pywa 'th esov pub eur yn toemmder ha yeynder rew, sur nos ha dydh. Ny besyav gweles mab-den gans ow bodh yn neb termyn, mes kompani lieskweyth a bub best. Oll an trobel dhymm yma an chorl Abel rag ladha. Hemma yw gwir, dhymmo trest. Prag y hwruss'ta y ladha, hag ev dha vroder nessa? Henna o gwann-ober gwrys. Drefenn ev dhe'm kontrolya, ha my y vroder kottha! Ny wrug revrons dhymm y'n bys! Der henna my a angras ha pur uskis a'n ladhas. Ny'm beus edrek a henna. Molleth Dyw ha tas ha mamm gallas genev vy droglamm poran rag an ober na. Ow holonn hwath yth yw prout, kynth oma ogas marow. Mersi hwilas yma dhymm dout dhymmo rag an oberow. My a woer y vos Dyw stout. Dhymmo ny vynn ev gava, na gevyans my ny hwilav. Yth esov ow tremena; dhiso ny vynnav gava. Ow ena ny wonn pyth a: dhe ifarn yw y drigva. Ena triges, gwav ha hav. A, soweth gweles an prys! Kaym ow hengeugh yw marow! Ragdho ty a vydh ledhys, a fals lader kasadow! Skwatyes yw dha ympynnyon! Out, ellas, my yw marow, ha'w fenn skwatyes pur arow - hwi a'n gwel - ynter diw rann! Rakhenna mos alemma my a vynn, gwella gallav. Ny amont guthyl dughan lemmyn ragdho. Yma Kaym adla marow. Deun dh'y hedhes dhe baynow, ha'n paja Lamek ganso. Deus, a ena milligys, dha vroder ty a ladhas, Abel, neb o den gwiryon. Yn tan ty a wra leski, ha'n keth paja ma, devri, yn ifarn, hwi drog lawen Y'n pytt ma y hwredh triga genev vy, a-barth a-woeles, hag a lesk yn toemmder tan. Nevra ny dhewgh alena, myns na wra bodh an Tas. Seth, ow mab, dhymm deus omma, ha goslow ow derivas. Hirneth byw ov y'n bys ma, mayth ov skwith a'n lavur bras eus dhymmo pub nos ha dydh. Rakhenna ke alemma dhe baradhis heb lettya, ha'n Oyl a Versi hwila mar kyllydh, awos neb tra. Na dhout, gorthyp ty a vydh oll a'th negys. A das ker, ny wonn for' dhi, na ny veuv bythkweth ena. My ny allav prederi pana gwartron yth a-ma, syrr, dhe hwilas paradhis. Gwith yn hons kompes dhe est. Na gemmer dout na mystrest mes an for' a vydh kevys y'n vaner ma. Ty a wel olow ow threys pan dheudh vy a baradhis ewn y'n veri prynt leskys pan veu an nor milligys der ow oberow ena. Ha pan dheffesta dhe'n plas, ty a gyv y'n yet unn el a ro gorthyp dhis y'n kas, ha'w desir ny wredh fyllel. Bydh avysyes a bub tra a welydh, ow mab, ena. Ow thas ker, mos alemma my a vynn, y'n by-and-by, hag y tov dhy'hwi arta gans gorthyp, kyns es hedhi, der bodh an Tas a-wartha. My a wel ol treys ow thas, a'm led vy dhe baradhis. Hemma yw marthusyon bras. An nor sur ny sewenas y'n for' may hwrug ev kerdhes. Der temptashyon bras an jowl, chassyes on a baradhis, mayth eth genen hager dowl, ha dhe veschyf bras koedhys yth en der ordyr an Tas. Tru, go-vy. My a wel an plas gloryus ha'n el y'n yet ow sevel, splann dhe weles ha preshyous. My a vynn mos pur uvel ewn dhodho, dh'y salusi. El Dyw an nev a-wartha, dhis lowena ha meur joy! Devedhys yth ov omma gans Adam ow thas dhy'hwi, yndella mar pewgh plesys. Seth, deus nes, ha dhymm lavar dha negysyow heb danjer ha na gemmer own y'n bys. Ow negys yth yw hemma: dhe hwilas Oyl a Versi. Charjyes yth ov yndella gans ow thas omma dhy'hwi, agas bodh mars yw henna, rag yth yw ev koth gyllys, hag y'n bys ma nans yw skwith. Y drobel yth yw kemmys hwansek nyns yw dhe dravydh, mes pub eur ma ow kria war-lergh an Oyl a Versi. Deus nes dhe'n yet, Seth, ha mir. Ty a wel oll paradhis. Avis pub tra, ha lavar pandr'a welydh a strangeness y'n jardin a-barth a-ji. Agas bodh mars yw henna, my a vynn skon avisya an marthusyon eus ena. Lemmyn, Seth, lavar dhymmo a-bervedh pandra wel'ta. Na wra keles unn dra. My a wel sur unn wydhenn, ha serpont ynni a-vann. Marow sygh hi a 'valsa. Honna yw an keth wydhenn a wrug kyns dha vamm ha tas dybri an aval a anken o difennys gans charj bras a anow an Tas Gwella. Ha'n serpont na a wel'ta yth yw an veri pryv na a wrug an jowl dhe entra ynni hi rag temptya dhe'th vamm Eva. Der henna, Dyw a sorras, ha dhe vy ev a or'nas alena aga chasya. Lavar pandra wel'ta moy. My a wel goodly wydhenn ha'y thopp pur ughel yn-bann. Bys yn nev 'ma ow tevi. Ha'y gwreydhyow dhe'n dor isel yma ow resek, pur lel, bys yn ifarn, pytt pur grev. Hag ena ow broder Kaym my a'n gwel ev yn meur bayn, hag yn trobel mayth yw gwev. Hag yn topp an keth wydhenn my a wel unn maghteth hweg ow 'sedha, yn pur sertan, hag yn hy diwvronn flogh teg, dell hevel dhymm yndella. My a lever dhis diblans: honna (lel yth yw henwys) yw an Wydhenn a Vywnans. My a hedh rann a'n frutys, hag a dhro part anedha, aval pur vras. Mir, ottomma teyr sprusenn a dheuth mes a'n aval ma. Kemmer i ha gorr yn-bann yn neb tyller dhe govva, ha dog i genes dhe'th tas. Pan vo diwedh y dhydhyow, hag y'n dor dhe vos ynkleudhys, gorr sprusenn yn y anow, ha'n dhiw arall kekeffrys, bedhens gorrys yn y dhewfrik. Hag y tyv a'n keth sprus na unn wydhenn wosa hemma, na berth dout, a vydh pur deg. Ha pan vo hi kowl-devys, hi a vydh pub eur parys dhe dhoen an Oyl a Versi. Pan vo pymp mil ha pymp kans a vlydhynyow kler passyes, y'n eur na gwaytyes dihwans war-lergh Oyl Mersi pup-prys, ha Salvador yn tevri a'n doro mes a baynys. Lavar dhe'th tas yndella, ha dhodho yth yll trestya. Yndellma yth yw 'poyntys. Fisten dihwans alemma. Ow bennath dhis. Meur a ras dhy'hwi, el Dyw, ow tiskwedhes dhymm pub tra. Dh'ow thas ker oll par dell yw my a vynn sur y dhyska; an marthusyon dell yw bras. My a vynn mos alemma yn hanow Dyw a-wartha, dhe dre dhe Adam ow thas. Lowena dhy'hwi ow thas! Devedhys a baradhis yth ov lemmyn, dhe Dhyw gras. Ow negysyow yth yw gwrys, par dell wrussowgh dhymm or'na Wolkomm os, Seth, genev vy. Pana nowedhys eus genes? Mars yw an Oyl a Versi dres genes omma dhe'th tas pur lowen my a via. Nag yw hwath, ow thas, forsooth. My a lever dhywgh, dell goedh, an gwiryonedh a bub tra. Pan dheffo an termyn playn a bymp mil ha pymp kans vlydhen, an Oyl a Versi nena a vydh kevys. Yn paradhis y hwelis dyffrans marthusyon, heb dout; speshyal unn wydhenn loryus ow hedhes yn-bann pur stout bys yn nev, sur my a grys, ha'y gwreydhyow dhe'n dor isel bys yn ifarn ow hedhes, hag ena, pur wir heb fall, yth esa yn trobel bras ow broder Kaym, yn paynys. Now yn topp an wydhenn deg yth esa unn virgin hweg, ha'y flogh, pur semli maylyes yn hy diwvronn, wondrys hwans. Gordhys re bo Dyw an Tas, ow ri dhymm an nowedhys! Sur ny'm beus bys vydh mar vras nans yw termyn tremenys a vlydhynyow moy es kans. My a welas gwydhenn moy ha serpont yn-bann ynni. Marow sygh hi a 'valsa. Honna o drog bryv, heb namm, a doellas Eva dha vamm. Der henna y kellsyn jam joys paradhis rag nevra. Ottomma teyr sprusenn, dres mes a baradhis dhy'hwi. A aval y fons terrys a dheuth a'n wydhenn, devri, yw henwys Gwydhenn a Vywnans. An el a or'nas dhymmo, pan vo diwedh dhe'th tydhyow ha'th vos gyllys alemma, gorra sprusenn y'th hanow, ha'n dhiw arall pur dhiblans yn dha dhewfrik. Mes a'n sprus y fydh tevys gwydhenn a vydh pur breshyous wosa henna, marthys teg yn pur dhevri. Ha pan vo hi kowl devys, hi a vydh pub eur parys dhe dhoen an Oyl a Versi Meur wordhyans dhe'n Drynses Tas ow krontya dhymmo selwyans, wosa hemma kynth yw pell. Seth ow mab, goslow dhymmo, ha dha jarjya my a wra yn-dann ow bennath, pur lel. Gwayt an Tas a Nev gordhya, ha pub eur orto koela yn pub edhomm y fes-ta. Ev a wra sur dha sokra, hag a vynn dha ventena y'n bys ma pell dhe vywa. Ow mab, merk an geryow ma. A das ker, meur ras dhy'hwi a'gas dyskans da pub prys My a goedh yn pur dhevri gordhya Dyw an lel Drynses, ha'n Mab gwella, ha'n Spyrys Sans, aga thri. Dell yns onan, my a grys tri ferson yns, pur wordhi, ow kesreynya yn joyys yn Gwlas Nev eus a-wartha. ha rakhenna y koedh dhymmo gans kolonn bur aga gordhya. Koth ha gwann yth ov gyllys. Ny'm beus bywa na fella. Ankow yth yw devedhys. Ny vynn omma ow gasa dhe vywa omma unn spys. My a'n gwel prest gans gyw, parys dhe'm gwana pub tu. Nyns eus skapya dhe-vy. A'n prys mall yw genev. My a servyas pell an bys, a-ban veuma kyns formys. Naw kans bloedh ov, my a grys, ha deg warn ugens, reknys, mayth yw prys mos alemma. Fleghes a'm beus dineythys a Eva ow fries, meur, dewdhek warn ugens genys a vebyon, hemma yw gwir, heb ow mab Kaym, hag Abel. Ynwedh dewdhek warn ugens a vyrghes yn pur dhiblans my a'm beu, heb toell na gil, a dhallethvos an bys ma. Ha'n bys yth yw ynkressys dredhov vy hag ow fleghes heb nomber dhe vos komptys. Dhe Dhyw y hwonn gras ragdha. Adam, gwra dhymmo parys. Ty a'm gwel vy devedhys dha vywnans gans ow spera dhe gemmeres alemma. Nyns eus gortos na fella; rakhenna gwrav dha wana, der an golonn mayth ello. Ankow, y hwonn dhis meur ras ow bywnans dhe gemmeres mes a'n bys ma, rag pur skwith ov anodho. Dhe Dhyw y hwonn gras ragdho. Gwynn ow bys bos dhymm fethys lavur ha dughan an bys. Pell my re'n servyas omma. Ha rakhenna gwrav kemmynna dhe'n lel Drynses ow ena. Kowetha, bedhewgh parys, an dhewolow pub onan! Ena Adam tremenys deun dh'y hedhes dhe'n gegin, dhe'n pytt down barth a-woeles. Na, na, ny wredh yndella! Yma ken or'nys ragdho. Yn lymbo barth a-wartha ena ev a wra triga, dell yw or'nys gans an Tas. Ty a woer yn ifarnow yma manshyons, heb gow, neb yma an dhewolow a dheuth mes a nev golow genev vy ow toen rewl vras. An chorl Adam y drigva a vydh a-barth a-wartha, yn onan a'n kloysters na neb na vydh tamm lowena, mes yn tewolgow bras ena, ow kelli presens an Tas, ha'n moyha payn a vydha y vab Kaym. Yn paynys bras ev a drig bys vynytha. Yma ev barth a-woeles yn pytt down ow leskya. Praga na vydh an chorl Adam yn kettella tormentys? My a wra dhe'n horsen kamm bos kalessa prisonys mar kallav, kyns es hedhi, drefenn terri gorhemmynn. My a lever dhis an kas. Kyn hwrug Adam pegh mar vras, ev a'n jeva edrek tynn, ha Dyw dhodh' ev a avas y dhisplesour ha'y sorr bras, hag yndella ny wrug Kaym. Ev a ladhas y vroder ny gemmeras edrek vydh, mes y rejoysyas pur veur, hag a sorr an Tas travydh yn sertan ev ny synsis. Rakhenna bys vynari ev a dryg ena devri yn paynys bras, avel ki. Joy nev yw dhodho kellys. Eya, Kaym ha'y gowetha y'n keth ordyr a vywa an plas yw or'nys ragdha, yn ifarn barth a-woeles. Hag Adam, venjans dhodho, lymbo yw or'nys dhodho. Ya, ragdho ev ha'y gowetha ny dastyons an payn bras. Yth'oll agan viaj ni, re'n jowl bras, ny dalvydh oy! Triges an chorl neb yma. Deun ni warbarth, a gowetha, dhe ifarnow alemma, dhe'n paynys a dhur nevra. A ena Adam dremas, deus genev dhe ifarnow. Ena or'nys dhis yw plas gans an Tas, dhiso, heb gow, dhe remaynya rag seson. Pan dheffo an Oyl a Versi, ty a vydh kyrghys dhe'n joy dhe'n nev ughel a-ughon. Ow thas pan ywa marow my a vynn y ynkleudhyas. Deun alemma heb falladow; gorryn an korf y'n gweres gans solempnyta ha kan. Mes a'n dor ev a veu gwrys, hag arta dhe'n keth gweres ev a vydh treylyes sertan. Ha dell veu dhymm kyns or'nys, an deyr sprusenn yw gorrys yn y anow ha'y frigow. Dell o ev an kynsa den a veu gans an Tas formyes, y'n bedh otta ev lemmyn. Dhe'n Tas Dyw re bo grassyes omma rag y oberow. Enok yth yw ow hanow, lel servont dhe'n Trynses Tas. Mab Jared yth ov, heb gow. Sevys a linyeth pur vras heb dout yth ov. Ha, pur lel, an seythves degre dessendys a Adam ov. Yn oes my yw y'n eur ma tri hans tri ugens yn prov, ha hwath pymp moy, pan eus dhymm kov, y'n jydh hedhyw. My a bys dhe wrier nev may fen pub eur plegadow dhe vones y servont ev y'n bys ma heb falladow hedra ven byw. Enok, my a lever dhis ow bodh dhe vos yndellma: may festa kwykk transformys. Dhe baradhis alemma my a vynn may fes uskis hedhys yn korf hag ena. Bydh parys y'n termyn ma. Hag ena y hwres gortos ogas dhe worfenn an bys. An mysteri yth yw pur vras; genev ny vydh disklosyes dhe dhen vydholl y'n bys ma. Gordhyes re bo Dyw an Tas! Dha volonjedh re bo gwrys! Hemma yth yw marthusyon bras. Yth esov ow pos gorrys ny wonn py le! My a woer hag a lel grys gwrians Dyw y vos hemma. Devedhys dhe baradhis my a woer gwir yth oma. Plas delysyous yw hemma. Pellder ynno my a vyw. Der demptashyon an tebel ow hendas Adam, pur wir ev re gollas, der aval, an plas gloryus pur sur, mayth yw gwev oll dh'y yssew. Rakhenna, pobel an bys, na wrewgh terri an difenn a vydh gans Dyw dhywgh or'nys, dout dhe gavoes drog worfenn ha meschyf bras war bub tu. Mara kwrewgh orthiv koela hwi a's bydh wosa hemma joyys nev yn unn rew. Kemmys peghes eus y'n bys gwrys gans tus heb amendya, mayth yw Dyw an Tas serrys bythkweth gul mab-den omma. Dystruksyon yma or'nys pur sertan war oll an bys, may fydh konsumys pub tra. Henna yth yw konvedhys der an dyskans eus dhymmo res gans an Tas eus a-ughon. An planetys eus a-wartha, ha'n ster ynwedh maga ta, ow poyntya 'mons pur efan. An howl ha'n loer kekeffrys, oll warbarth yw konvedhys, dhe'n porpos na 'mons ow tos. Ha'n dystruksyon a vydh bras, may fydh an bys distruys der livyow a dhowr pur vras, po der dan y fydh leskys. Krysewgh dhymm mars owgh hwi fur. Rakhenna gwres tus doutya an Tas Dyw dhe offendya der neb maner for' y'n bys. Rag voydya an peryll na, skrifys yma dhymm pub tra a dhallethvos an bys ma, may fova lel rekordys a vyns tra eus ynno gwrys. An lyvrow ottensi omma. Hwi a's gwel, wondrys larjya, ha pub tra oll y'n bys ma skrifys yma yn re ma, dout na vons i ankevys. Dew bilar mynnav 'poyntya rag an porpos na hware. Brykk a vydh onan anedha, ha marbel a vydh y gila. Rag sawment i a vydh gwrys dhe'n lyvrow. A'n brykk rag na vons leskys der dan vydh, henna yw gwrys, ha'n marbel tamm konsumys der dhowr ny vydh, hemm yw gwrys, drefenn y vos men garow, wondrys kales. An pilars yth ons parys. Gorrewgh ynna an lyvrow. Nyns eus art vydh ankevys, na tra arall, sur heb wow, mes ynna ymons skrifys. A bub sort oll a lyvrow ekwal ynno yw gorrys. Kepar yth yw an sortow gorrys ynna der dhevis, yn dyffrans ha kehaval. Lemmyn my a's gorr yn-bann, hag y'n eyl sur bys vykken an rekord a vydh heb fall pur wir kevys. Rakhenna, pobel doutyens, ha dhe'n Tas gwren oll pysi na 'skynno an keth venjans yn neb termyn warnan ni na'gan fleghes. Drog yw genev guthyl den, preshyous haval dhe'm honan. Rag koela orth unn venyn glan ev re gollas y blas a'm leuv dheghow a wrussen. Pan wruga dres ow difenn mes a baradhis pur lan hware an el a's gorras. An spyrys ny dryg nevra yn korf mab-den vydh y'n bys, ha reson yw ha praga, rag y vos kig medhel gwrys ha pur vrottel gans henna. Nyns eus den orth ow servya len ha gwiryon sur pub prys saw Noy yn oll an bys ma, ha'y wreg ha'y fleghes keffrys. Ow bodh yth yw yndella: gul dial war oll an bys may fydh pub tra konsumys, mes sertan mynnav sawya. Noy, mab Lamek, gelwys ov. Arloedh bras, oll perthewgh kov, yth ov, omma y'n bys ma. Substans lowr a byth ha da yma dhymmo dhe vywa, mayth ov synsys rag nevra dhe wordhya ow Arloedh da, an Drynses eus a-wartha. Noy, deus dhymmo vy lemmyn, ha goslow dhymm a gowsav. Parys ov, Arloedh bryntin. Dha volonjedh lavar e. Noy, mar lenwys yw an bys lemmyn a sherewynsi mayth yw diwedh devedhys ynno a gik pub huni. Gans pegh pur wir yw flerys. Ny allav sparya namoy heb guthyl mernans a verr spys war bobel oll marnas ty ha dha wreg ha dha fleghes, ha'n pyth a long dhiso jy. Rakhenna fisten, ke, gwra gorhel a blenkys playnys, hag ynno lies trigva. Roumys i a vydh henwys. A-ves hag a-ji yn ta gans pyg bedhes stancha gwrys, ha tri hans kevelin da an lester a vydh yn hys, ha hanterkans kevelin ynwedh ty a wra yn les, ha'n ughelder my a vynn deg warn ugens may fo gwrys. War-tu a-dhelergh daras ty a wra. Port ev a vydh henwys. Jistys dredho ty a blas, a-les rag na vo diges. A bub eghenn a ginda gorow ha benow ynwedh, aga gorra ty a wra yn dha lester a-bervedh. Pub maner boes y'n bys ma eus dhe dhybri gwayt may tredh; rag den ha best maga ta. Yn dha lester gwayt may fydh. Arloedh krev, dha arghadow my a wra, so mote I go! Ow lithyow, heb falladow, my a vynn dalleth strechya. Gans ow boel nowydh lymmys my a skwat pub pis tymber, hag a blayn oll an plenkys, ha'ga sett pub plenkynn sur. My a galk dhywgh wondrys fin nag ello dowr vydh ynno. Kyn fo-va gwriys a o'erbyn y fydh stanch, my a ragdho. Yma pyg dhymm proviys, ha lovanow pub eghenn. Dyffrans sortow a wernow yma parys pur efan. Marth yw genev a unn dra, y vos-ta mar wokki, Noy. Praga yw genes jy omma byldya lester mar wordhi yn kres pow, dhiworth an mor? My a syns dha skians hwath dhe vos. Yn kost a'n par na oll dha lavur ny dal kath, my a'n te war ow ena! Gokki yth os. Ow hothman, na gemmer marth. Ty a'n oel, ha lies mil. Kynth o'ta 'skynnys yn hwarth, y'n diwedh, heb toell na gil, hwi a wel dial uskis. Gwarnys ov gans Dyw an Tas dhe wuthyl an lester ma, rag ow sawya ha'w fleghes dhiworth an keth dial na. Hwi a wel a-ji dhe spas. Der livyow a dhowr an brassa oll an bys a vydh beudhys. Gwell via a ves-ta kregys, ty hag oll a'n kryjyans na! A jorl koth, ty benn-pilys, fatla vynnta jy henna; y fydh an bys konsumys? Oll an dowrow y'n bys ma, kyn fons warbarth kuntellys ny wra diwedh a'n par na! Saw yth o'ta jy gokki oll an bys a yll godhvos. Venjans war dha benn-kreghi! Nyns eus omma den y'n wlas a grys dhis malbew vanna. Praga, pandr'yw an mater? A vynn Dyw beudhi an bys? Mara ko'sta, dhymm lavar an okkashyon, my a'th pys, der vaner da. An okkashyon yw hemma. Kemmys peghes eus y'n bys, ha nyns eus tamm amendya, mayth yw an Tas Dyw serrys gans oll pobel a'n bys ma. Hag edrek dhodh' ev yma bythkweth mab-den dhe vos gwrys. Rakhenna gwrewgh amendya; a'gas foli bydh neghys. Y'n eur na, der vaner da, mara pydhowgh repentys, an keth plag a wra voydya. Piw a'th gwrug jy pregowther dhe dhyski omma dhyn ni? Y praydha dhymmo lavar, a wrug Dyw kewsel dhe-jy only, heb den arall vydh omma? My a woer yma y'n pow lies den a gews a'n Tas, tus perfeyth, my a'n avow, yth yns i, ha polatys bras, a wayt bos yn favour Dyw. Syrra, dhe rann a'n re na ev a vynnsa disklosya an dystruktyon bras ha'n liv. Rakhenna dhiso krysi my ny vynnav moy es ki. Na 'mendya ny vynnyn ni, awos dha eryow wastyes. Da yw dhiso jy bos fur, hag oll pobel a'n bys ma. Ny vydh Dyw nevra pur wir kevys gowek, trest dhymmo. Ragdha bedhewgh avisyes. Mar ny wrewgh, venjans pur vras a 'skynn warnowgh kyns nep-pell, rag Dyw a vynn, agan Tas, dannvon liv a dhowr pur lel, sertan dhe veudhi an bys. Rag omsawya ow honan, keffrys ow gwreg ha'w fleghes, an lester a vydh genen der weres Dyw uskis gwrys, rag voydya an danjer ma. Tetivali, bramm an gath! My ny grysav dhiso hwath, y fynn Dyw gul yndella. My a woer. Ny wrug an bys ha'n bobel myns eus ynno dhe vos mar gwykk distruys. Anpossybyl yth ywa an dowr na dhe vos kevys. Anpossybyl nyns yw tra dhe Wrier oll an bys ma, awos distrui an bys a-ji dhe our. Rag der er oll a veu gwrys, nev ha nor, myns eus omma, ha der er arta, dhymm krys, ev a yll, mara mynna, y dhistrui der an dowr. Ny amont dhymmo resna genes, Noy, my a hevel. My a vynn mos alemma, rag yth o'ta drog ebel na vynn nevra bones 'vas. Purra fol ny veu gwelys. My a lever dhis praga. An lester yw dallethys, hwi a woer, nans yw polta, a vlydhynyow pur lies - moy es ugens rag mar vras yw dallethys nevra ny vydh diwedhys. My a'n te war ow honshyans. Now an lester yth yw gwrys, teg ha da dhe'm plegadow. A bub eghenn a vestes drewgh hwi kwykk dhymm orth koplow chatel, ydhyn, kekeffrys, dew ha dew, benow ha gorow. Nyns eus best na pryv y'n bys, benow ha gorow omma, genev dhy'hwi nag yw dres. Y'n lester y tons ena. A das, lemmyn gwrewgh parys. An liv nans yw devedhys! Yma lower den y'n bys kyns lemmyn sur gewsis agas bos hwi gokki. Pan wrussowgh gul an lester omma prest yn kres an tir, mor vydh nyns esa, devri, dh'y doen yn kerdh. Ges a wrussons anodho. Dout sorr Dyw nyns esa dhedha nena, my a woer gwir. An liv nans yw devedhys, mayth yw da dhyn fistena. Pub best oll yma gyllys y'n lester dh'aga hinda dell yw or'nys dhymmo vy. Kewgh a-bervedh, ow fleghes, ha'gas gwragedh maga ta. Ogas an nor yw kudhys der an glaw eus a-wartha. Ty, benyn, a-bervedh deus. Ow! dar! beudhi a vynn'ta? Res yw sawya an pyth eus. Ny'n dal dhymm tewlel dhe ves. Da yw dhyn aga sawya. Y kostyons showr a vona, an keth taklow eus omma. Noy hweg, ty a woer henna. Nans yw meur a for', pur wir, a-ban kellsyn syght a'n tir. Rakhenna dhymm, ke bran vras, nij yn kerdh lemmyn ha mir tiredh mar kyll bos kevys, hag an golomm yn pur sur my a's dannvon pur uskis, syght an nor mar kyll gweles. Marow yw pub tra esa spyrys a vywnans ynno. My a worhemmynn hware dhe'n glaw namoy na wrello. Dhe'n Tas Dyw re bo grassyes! An golomm yw devedhys, ha gensi branch oliv glas. Arall bedhes delivrys. Dos ny vynnas an vran vras. Neb karyn hi a gavas. Nans yw ogas ha blydhen a-ban dhallathas an liv. Mars yw bodh Dyw y honan, neb yw Gwrier nor ha nev, dhe slakya an keth liv bras, y vodh re bo kollenwys omma genen ni pub prys, kekeffrys ha mab ha tas. Noy, my a worhemmynn dhis, ke yn-mes a'n lester skon, dhe'th wreg ha'th fleghes keffrys, ydhyn, bestes, ha pub lo'n. Meur wordhyans dhis, Arloedh Nev. Ty a weres gwann ha krev yn edhomm, sur, pan vo res. Deun yn-mes, byghan ha bras, chatel, ydhyn ha bestes; myns a veu y'n lester dres. Yn dehwelans peghosow gwruthyl alter my a vynn. My a vynn guthyl kanow, ha sakrifis(a) lemmyn rann eghenn a bub sortow, keffrys bestes hag ydhyn, gans henna dh'y enora. Ha rag henna gwren ni kana yn gordhyans dhe'n Tas omma. Hemma yth yw sawer hweg, hag ynwedh sakrifis da. Pur wir Noy, ev dhymmo a bleg, a leun golonn pan ywa dhymmo vy gwrys. Rakhenna sur my a wra bynytha wosa hemma y'n ebrenn y fydh gwelys an gammneves yn dhevri. Peskweyth may's gwelav vy hi, remembra ahanowgh hwi my a wra bys vynari, trest jy dhymmo. Dystruksyon vydh a'n par na bynytha der dhowr ny wrav, 'wos distrui an bys ma. Ha rakhenna kressyewgh, kollenwewgh keffrys an norvys a dus arta. Pub edhen ha best y'n bys, puskes y'n mor maga ta, a vydh dhywgh sosten omma. Nyns eus tra y'n bys ma gwrys mes dhy'hwi a wra servis. Bedhewgh war na vo ledhys mab-den genowgh hwi neb prys. Ha mar pydha yndella, my a vynn y rekwirya a dhiwla an keth den na y woes a dheu ha skoellya. Yn haval dhymmo omma imaj den gwruga shapya. Mara'm kerowgh dell goettha hwi a wra orthiv koela. Ni a vynn gul yndella, dell ywa devar dhyn ni, ha dha wordhya rag nevra, par dell yw agan duty. An keth jorna ma yw de, dhe'n Tas Dyw re bo grassyes. Hwi a welas, pub degre, lies maters gwariys, ha kreashyon oll an bys. Ynwedh oll hwi a welas an keth bys ma konsumys der livyow a dhowr pur vras. Ny veu unn mab-den sperys, marnas Noy, y wreg, ha'y fleghes. Dewgh a-vorow a dermyn. Hwi a wel maters pur vras, ha redempshyon grontys der versi a Dhyw an Tas, dhe sawya neb eus kellys. Mynstrals, gwrewgh dhyn ni piba, may hallen warbarth donsya, dell yw an vaner ha'n gis.